Bible Reader



Introdukshon

Dia e apòstelnan a mira Hesus riba un seru ku su figura kompletamente kambiá, nan a mira dos hòmber pará banda di djE, Moises i e profeta Elías. E evangelista Lukas ta nota ku nan tabata kombersá ku Hesus tokante su Éksodo benidero na Herusalèm (Lukas 9:31). Ku esei e evangelista ta referí na morto di Hesus, ku ta un salida for e mundu akí pa bai bèk serka su Tata. ‘Éksodo’ ta nifiká ‘Salida’ i ta nòmber pa e echo sentral den historia di Israel, esta salida di e pueblo di Israel for di sklabitut di Egipto, bou di guia di Moises.

E buki Éksodo ta kuminsá relatá kon e desendientenan di Yakob a sali for di Egipto, kaminda nan tabata katibu. Durante e opreshon di parti di e egipsionan e israelitanan a kuminsá keha i Señor a tende nan súplika. P'esei Señor a yama un tal Moises, un israelita, ku a haña su edukashon na korte di Fárao di Egipto. Den desierto Dios a revelá su nòmber Yahwe (den nos Beibel semper tradusí komo SEÑOR) na Moises i a dun'é e òrdu pa libra su rumannan for di sklabitut. Kulminashon di e parti akí ta selebrashon di e promé Pésag i e kantika di gradisimentu ku Moises i e israelitanan a kuminsá kanta ora nan a kaba di pasa dor di laman komo si fuera tabata tera seku. Meta final di nan biahe dor di desierto ta e pais ku Dios a primintí di duna nan. Pero promé ku esei E ta hiba nan Seru Sinai, kaminda na un manera impreshonante E ta manifestá su mes na nan. Aya E ta sera un aliansa ku nan i for di un grupo kon ku ta di emigrante E ta forma ún nashon, ún pueblo, Dios su pueblo privilegiá. Dios ta primintí di protegé i kompañá nan den forma di un pilá di nubia ku lo ta skur den dia i yen di klaridat anochi. Tambe E ke pa nan konsult'É i ador'É den un santuario ku hende por karga, huntu ku su ‘tènt di enkuentro’ ku E ta laga traha. Pero Dios ta stipulá su kondishonnan tambe: e dies mandamentunan ku nan tin ku atené nan n'e i otro lei- i preseptonan. Eseinan ta manera bòrchi ku ta duna direkshon: bai den tal i tal direkshon i boso lo alkansá berdadero libertat den un pais henteramente di boso mes.

Resúmen di kontenido

1. LIBERASHON DI SKLABITUT NA EGIPTO (1—12)

Opreshon na Egipto: hubentut di Moises 1—2

Dios ta yama Moises i ta prepar'é pa su tarea 3—4

Konfrontashon ku fárao; e dies plaganan 5—11:10

Fiesta di Pésag; salida for di Egipto 12—13:16

2. BIAHE DI E ISRAELITANAN PA SINAI (13—18)

Pasashi dor di Laman Kòrá; kanto di Miriam 13:17—15:27

E biahe pa Seru Sinai; mana 16—17:7

Lucha kontra e amalekitanan; bishita di Yitro 17:8—18:27

3. ALIANSA DI SINAI (19—24)

Preparashon pa e enkuentro entre Dios ku su pueblo 19

Señor ta duna e dies mandamentunan 20:1-21

Preskripshon adishonal 20:22—23:33

Seramentu di Aliansa 24

4. PRESKRIPSHON PA KONSTRUKSHON DI SANTUARIO: instrukshon detayá pa konstrukshon di e tènt di enkuentro ku tur kos ku ta pertenesé n'e (25—31)

5. KIEBRO I RENOBASHON DI ALIANSA (32—34)

E toro yòn di oro 32

Señor no ke kompañá e pueblo mas; orashon di Moises 33

Señor ta mustra mizerikòrdia: renobashon di e aliansa 34

6. EHEKUSHON DI E PRESKRIPSHONNAN RELASHONÁ KU SANTUARIO (35—40)

Konstrukshon di e tènt di enkuentro ku tur kos ku ta pertenesé n'e 35—39

Ta kuminsá usa e tènt di enkuentro 40